Mizoram buhfai supplier
Food, Civil Supplies & Consumer Affairs (FCSCA) minister chuan, Abu Ahmed Majumder-a'n April, 2020 aṭangin Mizoram tán buhfai a pek (supply) ṭan thu Assembly session-ah a sawi a; Abu Ahmed Majumder hian ZIDCO kaltlangin April 2020 aṭangin January 25, 2022 thlengin buhfai a supply.
ZIDCO kaltlanga buhfai supplier tur thlan a nih hi FCSCA department-in a hriatpui loh avangin eng ang chiahin nge an thlan tih hi mipui chuan an la hre lo ang. Abu Majumder hi tunge a nih mipuiin hre lo mah se November 25, 2021-a Mizoram leh Assam Chief Minister-te ramri chungchanga an inbiaka zanriah an kilnaah a tel ve nawlh tawh a. Sorkar official pawh ni lo kan ram tana thil pawimawh sawinaa a lo tel ve ngawt chhan hi Mizo mipuiin hriat kan phû a ni.
A tel ve danah lah inpuh tawnna a awm reng a, Mizoram BJP lam chuan Abu Mazumdar hi Mizoram lam sàwm ngei a nih thu Assam CM lamin an sawi tih an puang tawh a. Mizoram CM office leh MNF party lam chuan Abu Mazumdar hi an sawm a nih loh thu an lo sawi ve leh thung.
Engpawhnise Abu Mazumdar hi Assam Police-te'n kuhva tawlhruk chungchangah an lo man tawh a, chutiang miin Mizoramah buhfai a lo supply reng mai hi a zialo hle. Chu mai chu ni loin bail-a chhuah lailawk a nih laiin September 24, 2022 khan Kolasib-a Fast Track Court building sak tur lungphùm phumnaah a tel bawk a, Kolasib-ah Minister pakhat ina a châw ei lai thlalak a awm bawk.
Dan ang taka buhfai supply-tu thlan a nih pawhin kuhva rah tawlh ruka man tawk tawh ber kher thlan hi a mawi lo a, fimkhur a ṭul khawp mai.