Kan kawngpuia thil thleng hi
Kolasib district magistrate chuan, NH-54 kawngpui chhiat avanga lirthei tangkhang tamna Hmawngkhawthlir leh Seṭhawn inkar bik chu tlawhpawh phal lohna hmun, containment zone-ah a puang a, helai hmun aṭang hian Covid-19 vei eng emawzat hmuh chhuah an ni.
Tun hnaia Kolasib district chhunga thil thleng hi a pawi takzet a, kawng lehlama chhut phei chuan a thinurthlak a ni. Kawngpui a chhiat em avangin lirthei an kal tlang thei lo a, an tangkhang ta a, lirthei tangkhang avangin a khalhtute an inkal pawhin an inkawm a, khawtual mite nena lo inhne hnai (contact) tawk an awm lo thei lo a, Covid-19 lenlaia thil thlengah chuan a pawi hle a ni.
Sorkar lam hian kan kawngpui chhiat chhan hi a sawi fiah nual tawh a, contractor lam an mawhpuh zel a, contractor-ah an beng per ta zel a ni ber. Heti a nih chuan kan kawngpui hi contractor thiam loh vangin a chhe mek a, sorkar chuan thiam lohna pawh nei lo angin kan chhuah dawn dawn a; nimahsela heng thil zawng zawng a thlen theih chhanah hian mawhphurtu an awm a nih ngai chuan sorkar kan kawk lo thei lo.
Kan ram kilkhawr deuha kawng chhia a ni lo a, kan kawngpui pawimawh ber, kan nitin mamawhte kan lakluhna kawngpui a ni. He kawngpui hi tu kuta awm pawh ni se fur a lo thleng dawn tih hi sorkarin a hre lawk vek a, furah kawng a chhe zual ṭhin tih pawh a hria. Contractor remchan loh vang leh a siam hmaa thil endik lawk a ngaih vang tih mai maia kan ram pum tana hlauhawm thei dinhmuna kan ding mek hi a vanduaithlak hle a ni.
Lirthei tlanna tur kawngpui chu lirthei tlan hleihtheih lohin a chhia a, chutah chuan lirthei an tangkhang a, lirthei khalhtute zingah Covid-19 kai eng emaw zat an lo awm tih hriat hian lungawi a har a - hetiang harsatna a thleng chunga Kolasib DC leh a thawhpuite'n theihtawp an chhuah dan erawh a fakawm takzet a ni.