Police-in airport an tifai

5th IR Battalion-a police 50 chuan tun hnai khan Lengpui Airport an tifai a, hei hi Aizawl khawpuia G20 meeting nghah a nih dawn avanga inpuahchahna a ni a, Mizoram Police lam chuan an social media hrang hrangah an tarlang.

Police-te'n airport an tifai ta mai hian sawi a hlawh thar hle a, Assembly Budget Session kal mekah pawh sawi chhuah a ni nghe nghe. Police hian hna ṭang­kai dang pawh vantlang tan an lo thawk tawh ṭhin a, tuna an hnathawh an sawi zui ta luai luai hi a chhan ber chu Lengpui Airport ber kher an thenfai vang a ni ngei ang.

Zêp tur a awm lo a, airport chei ṭhat hna inpek dan leh an hnathawh danah hian Mizo mipui nawlpui lung a awi lo a, sum awm loh lai leh hripui lenlaia hmanhmawh taka thawhtir a nih dan te, an sak laia a chim bakah khualzinte hman tur baggage trolley-te an lo hman pên bawk avangin mipui mit hi airport-ah hian a fu ṭhup a ni ber mai.

Hetih hunlai taka airport thianfai tura police tirh a nih avanga mipui phun pawh hi thil mak a ni lo a, contractor-te hnathawhna hnuhma thianfai tura ngaihna a awm avangin mipui hi an lung a awi lo a ni ber.

Police-te hian chhiatna a thlenin mi an ṭanpui a, sorkarin a mamawhnaah hna ṭul thawk turin a ko thiang bawk; KR Construction hnathawhna hnawk thianfai tur anga puh loin G20 meeting inbuatsaihna peng pakhatah airport tifai tura koh an niah ngai ila a hahdam ang.