Kawng chhawng a la hnai lo?

PWD enkawltu Chief Minister chuan Assembly Budget session-ah zawhna ziaka chhángin, "Aizawl khawpui chhunga kawng chhâwng siamna tur DPR siam a la ni lo. DPR hi siam a la ni lo a, a copy pek tur a awm rih lo," a ti.

Chief Minister hian Aizawl khaw­puiah kawng chhawng siam theih a nihzia a sawi mai bakah a siam dan tur kimchangte thlengin ngaihnawm takin a sawi a, Aizawl khawpui chu traffic jam awm lohna leh lirthei hunna (parking) lama har­satna awm lohnaa siam an tum thu kum 2018 inthlan hma khan a lo sawi tawh a ni.

Tuna sorkar hian a term a hmang tawp ṭep tawh a, chutihlaia kawng chhawng siamna tur DPR pawh a la siam lo a nih chuan kum nga chhungin kawng chhawng hi an siam hman dawn lo niin a lang a, a zialo hle a ni. Hetihlai hian Aizawl khawpuia hmun lûn deuhlai Bawngkawn leh Vaivakawn lamah flyover siam tumna a awm thung a, hei hi thil lawmawm tak a nih rualin Chief Minister-in a sawi ṭhin kawng chhawng kha chu a ni si lo.

Aizawl khaw­puiah lirthei a pun chak em avangin kum li kal ta ai khan traffic jam hi nasa tawh zawk a, tun ang zela lirthei a pun chuan hun leh sum a lo thlawnin a luang ral nasa dawn a ni. Traffic jam tihziaawm dan kawng dap hi a ṭul takzet a, chumi atana Chief Minister hmachhuan kawng chhawng atana DPR pawh siam a la ni lo hi chu thil inhmeh lo tak a ni.