AR insawn hun leh politics

Home Minister chuan Assembly House-ah zawhna chhangin Aizawl khawpui laili aṭanga Assam rifles insawn chhuah hun tur hriat a la nih loh thu a sawi a, Mizoram sorkar chuan a tihtur a tih zawh tawh thu sawiin, Ministry of Home Affairs kut a nih thu a sawi.

Aizawl khawpui laili aṭanga Assam Rifles sawn chhuah chungchang hi kum tam tak chhung chu sawi a lo ni tawh a, politics-ah kai lutin inpuhtawnna pawh a tam tawh hle. He thil hi state sorkar kuta awm a nih loh avangin state sorkar tan tih theih a vang hle awm e.

Heti chung hian Assam Rifles an chhuak hnaia hriatin mahni party thiltitheihnaa chhuak tur ang maia sawi châk pawl an lo awm ṭhin a; hemi lehlamah chiah hian Assam Rifles an chhuah loh avanga state sorkar lo bei pawl a awm ve theih bawk a, politics nen kan chawm pawlh tawh avangin Assam Rifles insawn chhuah sawi hi chuan political party lam an rawn ri vat ṭhin.

Mizo mipuiin kan hriat chian ṭul tak chu Assam Rifles sawn chhuah hi sorkar laipui thu a ni a, tu hunlaia insawn chhuak pawh ni se, state-a sorkarna vawn fawng chelhtute thiltihtheih vang a ni dawn lo a, an insawn chhuak ta chiah lo a nih pawhin state sorkara mite chak loh vanga puh chi a ni lo ang.