Sorkar a che muang deuh em?

Chief minister hoa Council of Minister ṭhukhawm chuan, Mizoram páwn aṭanga mipui ni tin mamawh ni lo, bungraw dang phur lirthei rawn lut turte khuahkhirh an rêl; lirthei khalhtu leh handyman-te chu ramria entry point-ah uluk taka endik vek tur a ni a. Rapid Antigen Test-a negative finfiahte chauh Mizorama an luh tlang phal an ni ang. Kolasib district din­hmun thlithlai a, dis­trict administration hmalak­na enpui turin minister pathum an kal.

Kolasib district-a harsatna thleng mêk hi thil chi hnih angin a thlir theih a, tuna thleng thut a ni lo a, tunah hian a lang chhuak ta a ni mai. Mi ṭhahnemngaite chuan vawi tam tak an lo tlangaupui tawh a ni. 

Kawngpui hi siam loha a awm reng chuan furah a chhe zual dâwn a, lirthei lian tán kal tlang a harsa dâwn tih a hriat sâ vek a; nimahsela kan sorkar hotute lam aṭanga kan thu hriat chu, 'Mizoram sorkar kut a ni lo, contractor kut a ni e,' tih lam hawi zawng zel a ni. Tunah chuan kawng chhiat leh hri lêng a kal kawp tawh a, harsatna hi a thuk zual ta a, a zialo takzet a ni. 

Harsatna pakhat zawk driver leh handyman-te'n Covid-19 an rawn luhpui hi a zavaia dan theih chu ni lo mah se, ruahmanna fel zawk nen chuan tun ang em èma buaina a thlen hma hian thui tak chu ven theih a ni ang. 

Kan Mizo unaute ngei pawh state pawn aṭanga lo haw tur an zavaia endik an nihlai a, Assam aṭanga lirthei lo lut khalhtute endik loha an tlâng zel hi mi ṭhahnemngaite'n an ngaimawh thu an au chhuahpui tawh ṭhin a, Covid-19 posi­tive tam tak hmuh chhuah an nih hnua test leh hnuhnawh hi tih loh tawp ai chuan a ṭha zawk a, kalpui chhunzawm zel ni tawh se a ṭha ang. 

Kan minister pathum ngawt maiin Kolasib district an han tlawh rual ṭhawt maite pawh hi harsatna thlen hma khan lo bengvar hman se office aṭang pawha thutlukna siam theih chi a ni, tunah erawh Village Council inthlan puan a nih hnu, kawng chhiaa lirthei tam tak tlan hun nghaka an din laiin minister pathum ngawt an inzui thlak a ṭul leh ta si a, sorkar hi tlemin a che muang deuh niin a puh theih. 

Engpawhnise kan la hmelhriat ngai loh hri hlauhawm takin min luhchilh a ni si a, a dona kawngah hian ral rel thiam a harsa a ni e.