Chapchar Kut

Mizote kut ngaih hlut ber Chapchar Kut chu vawiin hian Mizoram hmun hrang hrangah läwm a ni dâwn a, Mizoram pawna Mizo awmte pawhin he kut hi an remchan angin an hmang ve bawk ṭhin.

Chapchar Kut hmanna pui ber Aizawla neih hi dan naranin Lammualah neih ṭhin a ni a, mipui pungkhawm hmaah sorkar milianten thu an sawi a, zai thiamte inlanin lam thiamten hun an hmang bawk a, ennawm leh hmuh­nawm chi hrang hrang a awm bawk ṭhin.

Khawpui lian dangah pawh hetiang deuh hian Chapchar Kut hi hman a ni ṭhin a, a läwm dan thil danglam tak a awm hran lo. He kut hi Mizote tana hun pawimawh a nih rual hian khualzin hipna remchangah chantir theih a nih hmel a, tun thleng hi chuan khualzin hip tak tak tur khawpin kan la kalpui lem lo.

Kum tinin he kut hi kan läwm chho zel dâwn a, kan kal dan pangngaia punkhawmna hmun pangngai pan ngawt lo hian, mipui nawlpui tana hlimawm leh nuam zawk, Mizote tana kut hlu tak ni chunga khualzin hip thei tur zawnga duan thiam a finthlak ang.

Vanglaini chhiartu zawng zawngte Chapchar Kut chibai kan buk a che u.