G20-ah mau

Group of Twenty (G20) Business Meeting (B20) tun hnaia Aizawla neihah Mizoram Chief Minister chuan mau ṭhatna a sawi a, mau chu thil ṭangkai tak, dawithiam tiang (magic wand) ang mai a ni tiin, "Mizorama ramngaw 50% chuang hi mau awmna hmun a ni. Pathianin kan pi leh pute aṭanga min pek a ni a, mithiamte chhût dan chuan mau metric ton maktaduai 25 a awm a, a tam zawk chu hman ṭangkai loh a ni. Furniture, lehkhapuan leh thil dang siamna atan hman ṭangkai theih a ni a, magic wand ang mai a ni," a ti.

B20-ah hian an thu ngaihtuah leh sawiho tur zingah mau/rua hman ṭangkai lam hawi hi a tel a. Horticulture department enkawltu kan Chief Minister-in kal khawmte hnena thiam taka mau chanchin a sawi hi thil inhmeh tak a ni. Kan rama mau a tamzia a sawi ruala state pawn aṭanga tun hnaia mau kan lakluh, Brandisii leh Latiflorus ṭangkai theih zawkzia a sawi tel erawh thil finthlak ber a ni lo palh thei.

Engpawhnise tuna kan sorkarin a flagship programme ang hiala an sawi mau/ rua hi tun hnaia zawh tak, Mizoram budget Session-a Finance Minister thusawiah a lang miah lo mai a. Tuna G20-a kan thupui ber pakhat ni si a hma lawka kan rorelna in sanga Finance Minister budget speech-a a lang leh si lo kha thil inhmeh lo tak a ni.

Tunah chuan state dang mai ni lo ram dang palaite pawhin Mizorama mau ṭhat duhzia an rawn hre chiang chho zel a; he ram hian a mau/ raw neihte hi eng ang takin nge a ṭangkaipui ang a, economy chawikanna atan engtik aṭangin nge a hman ṭan tak tak dawn tih hi hriat a chakawm ta hle a ni.