Sorkar laipui min hmuh dan

Union Rural Development Minister of State chu tun hnai khan Mizoramah a lo zin a, Mamit district-a PMAY hnuaia in sak ṭanpuina mi 2237 pek a nih tawh laia 424 chauh zawh a ni leh, tun hnaia mi 1743 hnena first instalment pek chhuah a ni chauh chu Mizoram sorkar inthlahdah vangah a puh.

Sorkar laipui hruaitute hian tun hnaiah Mizoram an rawn tlawh zauh zauh tawh a, Mizoram sorkar hnathawh dana an duh khawp loh thu an au chhuahpui ta fo mai. Anni hian ṭhahnemngaihna tak tak nen sorkar laipui aṭanga sum lo kalte an rawn chhui zui a ni thei a, chutih rualin chhan dang neiin an awmna political party atana hamṭhatna awm thei an rawn bawhzui pah pawh a ni thei bawk awm e.

An rawn zin chhan leh an au chhuah chhan chu eng pawh ni se an thil sawi erawh a pawimawh em em a, kan state sorkar hnathawh dan fel tawk lo an rawn kâwk chat chat mai hi a zahthlak takzet a ni. Kan state sorkar sum hmanna lian tak, PMVJK hnuaia hnathawh zawhna lehkha thehluh tur kan thehluh lohte an rawn sawi lang tawh a, tunah PMAY lama kan kal dan dik lo an rawn sawi chhuak leh chiah bawk.

Sorkar laipui aṭanga Mizoram hmasawnna tura kan sum hmuhte a neitu zawkin kan hman dan a fel tawk lo leh, hna kan thawk muang lutuk hi a fel lo a, sor­kar laipui hotute min hmuh dan hi inenfiahna atan hmang ila a ṭha khawp mai.