Kuhva tawlhruk hian min tlawm em?

Mizoram police-te chuan kum 2019 aṭanga February 10, 2023 thleng khan Myanmar aṭanga dan loa kuhva rah lâk luh leh tawlhruk nia rinhlelh ip 17,456 an man tawh a; district 11 zinga district pali-ah kuhva rah dahna kudam 74 a awm.

Mizorama thil mak tak mai chu dan loa thil tawlhruk chu sawi loh an thil tawlh ruk dah khawmna ualau taka kan nei tlat mai hi a ni. Heng kudam-te hi Bawrhsapin ṭhiah tura a tih tawh hnuah pawh ṭhiah a la ni lo a ni mai lo a, kuhva rah tawlhruk dahna atan an la hmang zel a ni.

Kan ramah hian dan loa thil titute an huangtau hle tih zep rual a ni lo a, humtu emaw puitu emaw an awm a nih loh chuan ualau taka phurh kuhva rah heti zat hian check gate an paltlang thei lo ang.

Heti zat kuhva rah kan rama a lo lut hian kan police-te thlengin a timualpho a. Thil chhui chhuah harsa tak tak pawh chhui chhuak thiamten kuhva rah ualau taka phurh an man thei lo hi an inhmeh lo hle a ni.

Kuhva rah dahna kudam 74 zet kan ramah a awm a nih chuan Kuhva rah tawlh ruk a nasa hle tih a chiang a, kan ram dinhmun darthlalang a ni e.