Thutlukna siam ran a ṭangkai

Mizoramah Covid-19 vei an pun tâk thut avangin Health & Family Welfare minister hoin tun Pathianni khan inhmuhkhawmna hmanhmawhthlak an nei a, hetah hian mitthi vuinaa inkaihhruaina en ṭhat leh an duh thu an rel a. Covid-19 laka mipui himna tura inkaihhruaina awm sate ennawnin kal zel dan turah rawtna an siam bawk. 

Mizoram chu sawi loh khawvel pawhin a la hmelhriat ngai loh hripui a lêng a, khawvel pum a buai mêk a ni. Mi state leh ram dangte buai dan ngaihtuah chuan Mizoram hi a buai zual zingah kan tel lo a, sorkar, tlawmngai pawl, kohhran leh mipuite ṭan rual rah a ni a tih theih. 

Hetihlai hian India ram enin hri vei hi an pung chho zel a, hri vei hmuh chhuah tam ber ni hi a thleng chho zut reng mai a ni. Mizoramah pawh kan ziaawm deuh hman dawna a lan hnuah beisei loh takin hri vei an pung zel a, tunah chuan chhui kim harsa khawpin Covid-19 positive an pung chho zel a ni ṭan ta. 

Hetiang hunah hian thutlukna dik ber a awm hleithei lo a, hman ni lawka kan tána ṭha tura kan ngaih kha a lo ṭha ber lo a, thutlukna sawh sawn a ṭul chang pawh a awm ṭhin a, ram leh mipuite tana ṭha turah chuan hmanhmawh taka thutlukna siamte pawh a ṭul ṭhin. 

Sorkar hotu lamin kan state dinhmun thlira kan himna tura ruahmanna an siam zung zung hi a lawmawm a, hri lengin min chiah rei tawh avangin mipui lam an lo ṭang hleithei tawh lo palh a nih pawhin sorkar lam tal hi chu mar taka a ṭan zel a ngai. Mipui kaihruai tur leh veng tur te, mipuite zirtira a ṭul huna khuahkhirh thei hial turin sorkar hian tlutlukna siam zel thei se a lawmawm hle ang.