Mipa thih tam chhan chhui a ngai

Presbyterian kohhran hnuaia ṭhalai pawl, Kristian Ṭhalai Pawl (KṬP) chuan tun hnai khan rorel inkhawm an nei a, he ta an tarlan danin kum 2022 chhung khan Kristian Ṭhalai Pawl (KṬP) member mi 643 an thi a, thi an tam ber kum a ni. KṬP member thi zinga mi 567 chu mipa niin 88.18% a tling.

Mizoramah tun hnaia record hrang hrang enin mipa thi an tam fal hle mai a, hei hi a chhan chiang zawka chhui a ṭha hle. Kohhran ṭhalai pawl hrang hrang inkhawmpui report-ah mipa thi an tam zawk ṭhin a, a member-a mipa an tam zawk vang ni tho mah se hmeichhe thi zat nen a inthlauh chhan hi chhui tham a awm âwm e.

Hetia thlir thuak chuan zu leh ruihhlo vangin thihna a tam hle tih a rin theih a, zu zawrh avanga tihna thleng tam tih kha politics zawnga kai lutin kan sawi nasa ṭhin kha a ni a. Zu zawrh tihtawp hnu kum li velah pawh zu kaihhnawih thihna a la tam hle tih a rin theih a, zu khapna hi a thu mai ni loa a taka kalpui a hun takzet a ni.

Hei bakah hian kan ramah ruihhlo a zalen thar hle a, a lo luhna lam hi awlsam deuh pawh ni se kan ram chhunga zalen taka awmtir kher hi a fel lo a, sorkar mi rawihte bakah tlawmngai pawlte'n theihtawp chhuahin bei mahse kan thih dan en hian ruihhlo nghawng hi a na hle tih a rin theih.

Kan rama mipa thih tam bik hian chhan a nei ngei ang a, hei hi uluk taka zir chiana a chhan zawn chhuah ngam a, a tihziaawm dan ngaihtuah a ngai ta takzet a ni.