Vawk pul hri leh Vawk vulhtute

Lunglei district-a Lung­senah tun hnaiah vawk thi an awm leh zauh zauh a, African Swine Fever (ASF) vanga thi nia rin a ni a, he khua hi kum 2021-a ASF len ṭanna hmun kha a ni a, vawk tam tak an chân a ni.

ASF hlauh­awm­zia chu a takin kan hre tawh a, chhungkaw tam tak innghahna an vawk vulhte vawi leh khatah an pûl a, a pawi takzet a ni. Tunah ASF ni ngeia hriat avangin vawk an thi leh ṭan a nih chuan sorkarin thapui thawha a beih a ngai a ni.

He vawk pul hri avang hian Mizoram hmun tinah vawk vulhtute an rûm a, chhungkaw intunnunna tura an lo hualte chu hun rei lo te chhungin an mang a ni ber mai. He hripui laka inveng tur hian mitin an pawimawh vek a, chutihlaiin sorkarin a rang thei anga chet a lâk a pawimawh zual ang.

ASF avanga chhiatna a thlen zui tawh lohna turin tun aṭangin inven a ṭul a, sorkarin a thiam leh theihna zawng zawng nen a beih a ngai. Kum hnih kal ta mai khan a ram pumin ASF hi kan tuar a, kar loah a darh zau chak hle tih kan hre tawh.

Tunah Mizoram hmun khatah ASF nia rinhlelh vanga vawk an thi leh ṭan a nih chuan, vawk vulhtute manganga an ṭah nawn hmain ram pum huapa hripui laka inveng tura ralkhel dar vuak a hun e.