VC leh LC inthlan leh hripui

August 27-a Mizoram hmun hrang hranga Village Council inthlan tur leh Aizawla Local Council inthlan lo awm tur chu Congress leh BJP chuan sawn hla turin State Election Commission an ngen a, Covid-19 lêng mêk avangin inthlan buatsaih hun loah an ngai. 

Village Council inthlan hi dan pang­ngaiah chuan a hun tawh a, an term hi an pawtsei tawh zawk a, chutihlaiin dan chuan thlà 18 thleng pawhsei a phalsak thung. Tunah hian khawvel pumah hri a lêng mêk a, Mizoramah pawh hri kai thar hmuh chhuah an awm zel a, hetiang boruaka inthlan buatsaih hi political party ṭhen­khat chuan ṭha an ti lo. 

Thlirna dang aṭang chuan inthlan tho tho tur a nih avangin kan hma lam hun a hriat bawk si lo a, tuna inthlan kalpui mai pawh hi a finthlak zawk mai thei a, kan hripui lêng hi a chin a hriat loh avangin kan nghah hret avanga buai lo tura inngaih hi kan la buai dâwn chauh zawk pawh a ni thei a, inthlan kalpui mai pawh hi a ṭhat zawk theih dan a awm ang. 

Engpawhnise hetianga mipui punkhawmna tam tak ko chhuak thei tura inthlan buatsaih hi sorkar thuchhuah ṭhenkhat nen a inmil tawk lo a, district ṭhenkhatah mi panga aia tam vantlang hmuna awm khawm phal lohte an tihlai leh, mipuite pawh inhlat thei anga (social distancing) awm tura kan inzirtir laia mipui nuai chuang chetna tura inthlan buatsaih hi chu a huaisenthlak angreng hle a ni. 

A chhe ber dâwn chuan inthlang tura inbuatsaihna lamah hripui a darh phah chuan sorkar leh SEC lam hi an kawk zui dâwn a, a êng lam thlir erawh chuan kan hmalam hun a sawi theih loh avangin inthlan kalpui fel duak hi a finthlak zawk mai thei bawk - hunin a la hril ang chu.