Mauin sum a la lalut lo

Kum 2019-2023 chhungin Bamboo Development Agency chuan pawisa cheng nuai 933.3 a dawng a, Zuangtui Industrial Estate-a Bamboo Processing Factory chuan agarbatti stick kg. 8,510 siam chhuak tawhin hralh chhuah a la ni lo thung a; a hralhna tur indawrna a la kal mek niin Assembly Budget Session neih zawh tâka zawhna chhannaah a lang.

Mau atan sor­karin central aṭanga sum a hmuh tawh leh a hman tawh hi a ṭhahnem tham hle mai a; kum 2021-a Chief Minister/ Horticulture Minister-in Assembly zawhna a chhan danin, mau hi chi hnih supply a ni tawh a, a chi supply zat hi 32,77,750 a tling tawh a. Supplier pathumin supply-in, hemi atan hian pawisa cheng nuai 1516.72 hmuh a ni, tih a ni.

Hei bakah hian kum 2022, September-a Assembly Budget Session-ah khan sorkarin mau leh ruaah cheng nuai 2,359.46 a sen tawh thu leh sum a awm chuan sen belh zel a la tum thu sawi a ni tawh bawk.

Horticulture De­partment enkawltu Chief Minister sawi danin mau/ rua hi kan ram sum hnar la ni thei tur a ni a, tunah hi chuan insensona lam hlir a la ni. Engtikah emaw chuan mau/rua hmang hian Mizoram hi chawi kanin a la awm dâwn a ni thei a, tunah hi chuan mau hi state pachhe tak sum senna lian tak a la ni chauh mai. Mau/rua hmanga hausakna hai luh hun a nghahhlelhawm tawh takzet a ni.