Health care leh loan pûk

Mizoram Government Doctors’ Association General Conference vawi 37-naa khuallian Deputy Chief Minister chuan, mipuiin ṭangkai zawka Mizoram Health Care Scheme an hman a duh thu sawiin, inziak lut turin mipui a sáwm a, "Asian Development Bank (ADB) loan hmangin changtlung zawka kalpui a ni dawn," a ti.

Sorkarin an term an hmang zo dawn hnai tawh a, mipui dem an hlawhna zinga mi pakhat chu Mizoram Health Care Scheme-a bill a tang rei lutuk leh bill pek loh a tam lulai lutuk hi a ni. Assembly Budget Session neih zawh taka tarlan a nih danin Health Care Scheme hnuaia damlo mangangte bill sorkarin a bat zat hi vaibelchhe 65.90 lai a ni.

Mizoram sorkar tan pawh a luhaithlak hle ang tih a chiang a, a kalphung her rema siam ṭhat a nih loh chuan state pawisa nei lo tan chuan zawh loh nghawngkawl bahna ni berin a lang tawh a, tute pawh sorkar se Mizoram Health Care Scheme hi tuna kalpui a nih ang hi chuan phurrit a tling ngei ang.

Hetihlai hian ṭhangtharte phurrit belhchhah thei tura pûk belh zawng bawka health care scheme kalphung her rem tumna awm hi a fuh lo palh thei a, ADB aṭanga pawisa pûk belh hmanga mipui health care leiba rulh emaw, bat belhchhah zawnga kalpui hian ṭhangtharte buaina lian zawk a thlen a hlauhawm hle.