Kawngpui zauh tur a lawmawm

Chief Minister chuan tun hnai khan Durtlang Leitan leh Sihphir inkar kawng zauh leh thawm ṭhat hna thawh ṭanna (work commencement) lungphun a hawng; he kawngpui zauh tur hi km. 10.25-a thui niin, Rs 35,53,00,000 ruahman a ni. Kawng siamtu tur chu SLT Infracon an ni a, thla 18 chhunga zawh tura tih a ni.

Aizawl khawpui luhka pawimawh tak pakhat, tun hmaa kan kawngpui hlun ber ṭhin tihzauhna tur project a awm hi a lawmawm a, a nawr chhuaktu Chief Minister pawh a fakawm hle. PWD enkawltu Chief Minister sawi ang hian a kawngpui zauh hna thawhna tura sum nawr chhuah hi thil harsa tak a ni a, chutiang thil harsa ti thei Chief Minister kan nei hi a lawmawm hle a ni.

Kawngpui siamna tur sum awm zat kan hria a, a thawh hun tur pawh kan hre ta a, a hun takah a inziaka awm ang ngei hian thawk zo thei se; a hna vil kawngah khawtlâng mipui pawhin theihtawp chhuah se a ṭha hle a ni.

Mizorama project lian tham tam tak hi a hunah thawh zawh a ni ngai meuh lo a, sum dil belh reng rengin thawktute an awm a, an thawh muan avanga tuartu chu mipui an ni. Hetihlai hian a thawktu (contractor) lam tán chuan revised estimate a awm hian hlawkna a keng tel ve ṭhin a, thiam taka muang zawka thawh luih tumte hi an ang lek lek mai.

Harsa taka kawngpui siamna tur sum nawr chhuak thei Chief Minister hian a sum nawr chhuahsâ hi dik loa luan ral phal loin uluk takin vil zui se, sum ruahman lawk ang hian Durtlang Leitan leh Sihphir inkar kawng zauh leh thawm ṭhat hna hi a hun takah zawh theih ni se a lawmawm ang.