Thiamna leh dan hmanga eiruk do

Eirûkna do tura pawl din, Society for Social Action (SOSA) chu hun eng emaw chen hmalakna an neih loh hnuah tun hnai khan an intuaithar leh a; eirûkna hluar zel do turin hmalak an ṭum. SOSA hian member atan mi pakua - ukil leh dan zirlaite an la lut thar a, hruaitu an insiam rem nghal a ni.

Mizoramah hian pawl ṭha tak tak, thil tum ṭha tak tak nei hi an lo ding fo tawh ṭhin a, ram leh hnam tana ṭangkai takin thawk bawk mah se an daih rei lo fo. Hlawh nei si loa sum leh hun sen reng hi thil harsa tak a ni a, tlawmngaih chhuaha thawh reng hi chhan hrang hrang vangin a awlsam lo ṭhin a ni.

SOSA din ṭan tirh lam khan Mizorama pa challang, thiamna leh nihnaah pawh mi vantlang chunga lengte an ni hlawm. Huaisen takin thiamna leh hriatna nen eiruk an do a, Tuirial Hydel Project siamnaa zangnadawmna dik lo chungchang leh PMGSY hnuaia kawng laihnaa thil dik lo tam lutuk CBI-in an chhui theihna atana PIL theluttu an ni.

Eiruk kan duh lo tiin a thuphung chuan kan sawi ṭhin a, nimahsela mi thiam ni lo tan chuan eiruk hi tawngpawng do a harsa thei. Mithiam zawk leh hriatna neite chuan dan tlawhchhan mumal tak nen eiruk an do thei a, chutiang taka eiruk do tur chuan he SOSA pawh hi an ṭangkai ngei a beiseiawm.

Thil dik lo chiang tak pawh political party lamin an aupui chuan mahni tana chakai khawrh ve tho anga rinhlelh chin a awm ṭhin a, pawl rintlakin eiruk an do erawh chuan a dan a dang deuh ang.

SOSA hmasa in bul an lo ṭan tawh hi ṭhangthar zawkin huaisen leh chak zawkin kalpui chhunzawm se, eiruk hi kan duh lo tak tak a nih ngai chuan dan hmanga thiamna nena do hi a sawt hle ang.