Mizoram sorkarin electric hman man tih san a rawt
Mizoram sorkarin kawlphetha hman man tisang tura rawtna Joint Electricity Regulatory Commission (JERC) for Mizoram and Manipur hnena ngenna a thlen chungchangah, JERC chuan dodalna pathum an dawng. Mizoram sorkar chuan kum 2023-24 atan power tariff hman mek chu 3.15%-a tisang turin JERC-ah a rawt a, he rawtna hi tihpuitlin a nih chuan kawlphetha unit 1 man Rs 7.83 ni ṭhin chu Rs 8.08 a ni tawh dawn a ni.
Electric hman man hi a ngai rin reng theih a ni lo a, zawi zawia san chhoh zel hi thil kalphung pangngai a ni a; nimahsela tun hnaiah kum tin mai electric hman man a pung leh tipung tura rawttuah Mizoram sorkar a tel zel mai hi chu a zialo hle a ni. Khawvel ṭhan dan en leh sum leh pai vir vêl dan thlir hian electric hman man hi zawi zawia tihchet ngei chu a ṭul tih a lang a, heti taka zing leh sanga a man tihpun erawh mipui phurrit a ni.
Mizoram sorkar hian electric chhit manah hian mipuite a chhâwk nasa a, hei vang hian sorkar sum tam tak a kal ral a ni. Sorkar sum dinhmun a ṭha lo a, puk theih apiang pukin a kal mawp mawp a ni ber a, hetihlaia sum hmanna lian tham electric hman man lam lo siam rem tum hi a âwm viaua a lan lai hian sorkar ve riang ruang chuan a kuma tin maia mipui phur tirit belh lo tura ro a rel thiam a ngai.
Miin an dil leh an phût pawh ni loin, 'Pawisa kan sem ang,' tiin a zat tur nen lam an aupui a, chutihlaiin chu'ng mipuite hnen aṭang chuan electric hman man hmangin sum an khawn belh leh zel a nih chuan thil inhmeh lo tak a ni.