Khawpuiah fimkhur a ṭul zual

Tun hnaiah Aizawl khawpuiah Covid-19 vei hmuh chhuah an pung zel a, a ṭhente chu hri dona kawnga a hmatawnga ding (frontlihne worker) an ni a, anni hnen aṭanga kai chhawng lehte pawh an awm.

Mizorama Covid-19 kan hlauh zual lai ber kha tun hnuah hian thlir kir leh ta ila, a hlauhawm loh lai tak niin a sawi theih awm e. State pawn aṭanga luh theih loh lai a ni a, state chhungah a vei hmuh chhuah pakhat bak a awm lo a, rinhlelhawm deuh an endikte chu hri vei lo an lo ni vek a, chuti chung chuan hri a darh zel lohna turin ian inkhung a, ian inveng a, kan inhrêk ang hial pawhin a sawi theih ang chu.

Tun hnaia kan dinhmun hi kan thlir chuan a lo lut apiangin hri an rawn luhpui ta emaw tih tur khawpin hri vei an pung a, kan ṭhenawm Assam hi hri vei tamna an nih avangin kan bungraw phurtute zingah ngei pawh Covid-19 positive an tam ta hle. Kan tihsual lian tak chu kan unaute ngei state pawn aṭanga an rawn hawin kan khung hrang a, chumi hnuah uluk takin kan test leh thlap a; nimahsela lirtheia bungraw phurtu hnam dangte zawk kha endik mumal lohin, hri an kai nge kai lo pawh finfiah lohin rei tak chhung kan luhtir mai kha a ni.

Khawpuiah hri vei hmuh belh zel an ni a, khawtlang hruaitu lamin theihtawp chhuah mah se tih theih loh chi tam tak a awm a, sorkar tan ven sen a ni bawk lo a, chuvangin mimal an pawimawh chho zel dawn a ni. Ṭhahnemngaih thuah lockdown nelh leh zel te, mahni veng bil lockdown leh inkhuahkhirhna khauh zawk neih duhna a awm ngei ang a, a pawimawh ber erawh mahni ṭheuh fimkhur zel a ni ang.

Covid-19 dona kawngah Mizoramin bul kan ṭan ṭha em em a, mipui ṭanrualna zarah a tiṭha ber state pawh kan ni hial mai thei a; amaherawhchu he kawng kan zawh mek hi a zatve pawh kan la zo lo mai thei a, a bul ṭan ṭhat hi kan zawh ṭhat si loh chuan awmzia a nei lo ang - mipuite fimkhur zual ila, a bikin kahwpuiah hri a darh zel lohna turin i fimkhur thar ang u.