CM leiba thlir dan aṭang chuan HIV/Aids vei tamna kan ni lo

Finance Department enkawltu Mizoram Chief Minister chuan Mizoram chu leiba nei tlem ber dawttu kan nih chu tun hnaia Mizoram Journalists Association-in budget zir chianna an buat­saihah a sawi a; hmarchhak state-a Mizoram tiatpui dangten Mizoram aiin an bat tam vek thu sawiin, "State lian ṭhenkhat phei chuan cheng vbc. nuai 6 te an ba a, keini vbc. 10,000 vel," a ti a, state dangte leiba ngaihtuah chuan Mizoram chu ba lo ang tluk a nih thu a sawi.

Chief Minister hian kan leiba hi a tangka zat aṭangin a chhut a, a sawi ang hi chuan keini aia ba tlem pakhat chiah an awm. Hetihlai hian sorkar sum che vêla leiba an teh dan chu GSDP aṭangin a ni ṭhin a, sum lakluh aṭanga leiba zat chhût hi Reserve Bank of India-in leiba a chhût dan chu a ni a, hetiang a nih chuan Mizoram hi India ram state-a leiba ngah ber kan ni.

Kan budget pharh tâk kha ngun zawka kan thlir chuan cheng vbc 14,209.15 kha pûk a ni a, a rulh dan tur inang lo thluah, a pung zat pawh inang lo tak tak hmanga pûk khawm a ni. Kan leiba public debt leh liabilities on public account-te hi a sorkar berin a ngaimawh lo a, kan bat tlemzia rem leh rem loa kan sawi zel dâwn a nih chuan kan ram hmalam hun hi a ngaihtuahawm hle a ni.

Sorkar hnathawkten a huna hlawh an lâk theih loh aṭang hian kan sum dinhmun a chhe hle tih a chiang a, chutihlaiin a sorkar lamin a pûk theih ang ang pûk khawmin a ngaih pawimawh leh duhsak zawng lamah hnathawh a ṭhulh chuang lo. Hemi piah lama kan pawisa pûk tlem thu rintlak ziktluak lo sawi fo hi Chief Minister tih atan a mawi lo takzet a ni.

National Aids Control Organisation chuan Mizoram chu HIV/Aids tamna berah a puang a, a teh dan chu mipui zat aṭanga 2.3% zet positive an awm vang a ni. A zat (a number) chhiar chuan Mizoram aia HIV positive tamna state hi an tam hle a, nimahsela mipui zat aṭanga tehin Mizoram chu HIV positive tamna ber an ti mai a ni.

Chief Minister chhiarkawp aṭang hi chuan Mizoram ang state te hi leiba ngah state kan ni ngai dawn lo a; nimahsela kan tlem ang ang leh kan tet ang ang hian kan sum lakluh aṭanga inbûk tawk lo zetin leiba kan ngah si a, chu kan GSDP aṭang chuan kan leiba hi chhûtin RBI chuan leiba ngah ber state kan ni a ti zawk a ni.