Health care scheme awm sâ tihpuitlin

National Health Authority (NHA) bultumin Mizoram State Health Care Society chuan tun hnai khan 'Ayushman Sangam - North Eastern Regional Review Meeting' an buatsaih a; khuallian Chief Minister chuan, health care scheme changtlung leh huam zau zawka kalpui turin theihtawp an chhuah zel thu a sawi.

Chief Minister chuan, sorkar laipuiin AB PM-JAY a kalpui hma kum eng emaw zatah Mizoram sorkarin state health care scheme a ruahman tawh thu a sawi a, "Kum 2018 tawp lam aṭang khan tharthawh lehin, tunah chuan sorkar laipui scheme nen kal kawpin, tichangtlung zelin, huam zau zawk leh changtlung zawka buatsai zel tum a ni," a ti.

Mizoram sorkar hian state chhunga a mipui damlote inenkawlna turin ruahmanna ṭha tak a duang a. Chu Mizoram State Health Care Scheme chu a taka kalpui theih ni se tichangtlung tawh kher lo pawhin a awm sâ ang hi mipuiin an ṭangkaipui hle ang.

Tunah hi chuan MSHCS awm sâ hi sorkar hian a kalpui hlei­thei lo a, damlo mi harsa zawkte pawisa tam tak a bâ mêk a ni. Mipui lam hi chuan inziah luha chawi ngai ang ang te pawh an chawi mai a, an pawisa beisei lêt erawh an hmù hleithei lo a, leiba hi a tam tham ta hle a ni.

MSHCS hi a hranpaa tichang­tlung tawh kher lo pawh hian tuna a awm sâ hi a nihna angin hmang ṭangkai se a ṭha tawk hle a, mahni neih sâ pawh tipuitling hleithei lo chunga hma thar lâk hi a la hun lo deuh em aw?