Police lak thar tur hi

Mizoram DGP chuan tun hnaia Lawngtlaia police hmunhmate a tlawhnaah kumin chhungin police 700 lak belh tum a nih thu a sawi a, Mizoram Police-a sanction post 12,000 awmah 9,000 chiah hnawhkhah a nih thu sawiin, "Thawktu indaihlohna nasa tak su kiang turin Chief Minister hma­lakpuina hnuaiah kumin chhunga thawktu 700 lak belh tum a ni," a ti a, police-te chu ram tana an theihna zawng zawng nena hna thawk turin an hriselna uluk a, insawi zawi uar a, zu leh ruihhlo dang laka inthiar fihlim turin a chah. 

Mizoramah hian a hlawma police lak a lo ni zauh zauh tawh a, sawi zui tura police lak dan fel tawk lote pawh a lo awm tawh. Chutihlaiin 'City Police' tia palian leh sang ṭha tak takte a hlawma an lak changte pawh a lo awm tawh a, an ṭangkaizia pawh a hre chiangtu chu mipuite an ni awm e. 

Hei vang tak hian kan sorkar thuneitute hian a hlawma police lak tur hi uluk taka kalpui a nih ngei theihna turin ruahmanna fel tak siam se, lehkhathiam, hrisel 

ṭha, in tha zo, pa lian/ nu lian leh fel ṭha hi kan ṭhalai zingah hian ṭhahnem tak an awm tawh. Chutiang ni loa teh tlin chawp ngai, thiamna lama chhuan tur nei vak si lo, police a nihna anga chhawr hleihtheih loh khawpa chawr­che leh tuna police buaina lian tak zu leh ruihhlo lama fihlim lo hi chu lak loh theih ni se a 

ṭha khawp mai. 

A tawpkhawkah chuan police lakah hian politics a inrawlh leh inrawlh loh hi police kan neih ṭhat leh ṭhat loh hriltu a ni dawn a, Mizoram tana hna pawimawh thawk tur police lakah hi chuan politics avanga induhsakna hi awm lo hram se a duhawm hle.