Chakai farm

Fisheries Minister chuan tun hnai khan SEDP Pilot Project hnuaia Dumluia 'Chakai Demonstration Farm' kalpui chu a tlawh a, he enchhinna hi a hlawhtlin chuan lui dunga nungchate humhalh nana hmanraw ṭangkai tak a nih dawn bakah chakai farm siam chu eizawnna tlaka a hman theih tur thu a sawi.

DFDO, Kolasib tarlan danin Chakai Demonstration Farm hi enchhinna leh zirchianna a nih angin a tum ber chu cemented pond/tank-ah chakai vulh theih dan te, an inthlah pun dan, an ṭhan dan leh dam leh hrisel taka vulh an nih theih nana an thil mamawh hrang hrang zirchianna atana kalpui a ni. He project atan hian cheng nuai 39 sen a ni tawh a, sum lakluhna atana tih a nih loh thu Assembly budget session-ah Minister-in a sawi tawh bawk a ni.

Sorkar hian thil hrang hrang­ah zirchianna leh enchhinna hi a kalpui ṭhin a, chakai chauh ni loin ran vulh chi hrang hrangah te, thei leh thlai bakah pangparte thlengin a ṭhat duh leh duh loh te, a hlawk leh hlawk loh dan turte an zir chiang hmasa ṭhin. Chakai farm pawh hi chutianga zirchianna thil chu niin a lang a, sum lakluhna lam hawi ni loin sorkar department thil zirna lam a hawi zawk hmel.

He chakai farm hi a hlawhtling hlauh a nih chuan Mizoram hmun dangah pawh entawn ve theih tur niin a lang a; thawm nei ring tak mai chakai farm hi hlawhtling ngei turin uluk zawka vil zui ni se, sum tam tak senna project a nih angin hlawhtling ngei se a lawmawm ngawt ang.