AR insawn chhuak thuai se

Union Home Minister chu Zokhawsanga Assam Rifles battalion headquarters complex hawng turin tun hnaiah a lo zin dawn a, Chief Minister chuan, "Mizo mipuite beisei leh nghahhlelh em em, kan sorkar hmachhawp lian tak ni bawkin a tak ram a thleng tur hi a lawmawm ka ti a, Pu Amit Shah chungah pawh Zoram mipui aiawhin lawmthu ka hrilh a ni," a ti.

Aizawl khawpui laili aṭanga Assam Rifles insawn chhuak tur hi an in­buatsaih rei ta hle mai a, ṭhangkhat lian zet chu an inbuatsaih ta a ni ber mai. Tunah chuan a building an sa zo thawkhat tawh a, kawngpui an siam tawh a, êng leh tui a awm ta bawka insawn chhuak turin harsatna awmin a lang tawh lo.

AR insawn chhuak tur hi thil thar ni loin hun rei tak aṭanga chhuak tura inbuatsaih tawh an ni a, 1988 khan an insawnna tur landlease hi Mizoram sorkarin a lo hlan daih tawh a, ram an dil belhna pawh pek a lo ni leh tawh nghe nghe. An chenna tur ber pawh sak peih a ni tawh a, chhuanlam hrang hrang siamin an chhuak duh lo a ang ber.

Ministry of Home Affairs thuchhuak angin Assam Rifles te chu 31.5.2019 hmaa Zokhawsang a insawn tura tih an ni a, hei hi kan Chief Minister pawhin Lammuala Chapchar Kut lawm­naah a puang nghe nghe tawh a; nimahsela tun thlengin an la chhuak lo.

Tunah zet chuan Union Home Minister-in an awmna tur complex a rawn hawng dawn ta a, chu complex-a awm tur chuan Lammual hmun aṭangin an chhuak zui ngei tawh turah i ngai ang.