Ruihhlo do tura ṭanrual
Working Committee on Ruihhlo Do chu an Chairman, Social Welfare Minister hoin tun hnai khan an ṭhukhawm.
Social Welfare Minister chuan member hrang hrangte ruihhlo dona kawnga an thawhrimna leh inpekna chu ropui a tih thu sawiin, "Theihtawp chhuah zel a ṭul. Ruihhlo do kawngah hian kan ṭanrual a ngai takzet," a ti.
Mizorama ruihhlo lo hluar ta em em dona kawnga thâ thawh nasa tlawmngai pawl hrang hrangte leh sorkar department-te hman tur Mizoram sorkarin cheng vbc. 3 Core Committee on Ruihhlo Do hnenah a pek chu a sem zai dan tur an rel a, remchang hmasa berah Chief Minister hoa sem ni se, an ti.
Ruihhlo dona kawngah hian a ram puma kan thawhho ṭhat a ngai a, tuna kan kal dan ngaia kan kal a nih chuan kan dinhmun a chhe hle tih kan pawm tlan a hun ta. Kan ramah ruihhlo a hluar a, a chhan tam tak zingah zalen taka Myanmar aṭanga a lo lut ṭhin hi a chhan lian ber a nih hmel a, chutih rualin a lei duhtu lam kan tam bawk avangin a hluar zel ang tih hlauhthawnawm tak a ni.
Ruihhlo do kawngah hian a lo luhna lam tun aia uluk zawka ven a pawimawh a, a thua sawi a tam viau lai hian a taka ruihhlo lut tur ven kawngah sorkar hian tha a la thawh tam tawk lo niin a lang.
Myanmar lamah politics buaina avangin Zokhawthar luhna gate pawh sipaiin an veng tawh lo a, Mizoram lamah ni se ven mumal loh luhna khân tam tak a awm a, heti taka awlsama a luh theih chhung chu Mizoramah hian ruihhlo a hluar zel dâwn niin a lang a, Mizoram sorkar hian ruihhlo lo lut tur ven hna hi tun aia chak zawkin thawk rawh se.