ZMC tui pût leh kan hnathawh dan

Zoram Medical College-a building sak thar chu tun hnaia ruah surah tui a pût a, hei hi a rang thei ang bera siam ṭha turin Mizoram Pradesh Youth Congress Committee chuan sorkar an phût a, "Kan ram rohlu medical college hi uluk leh ṭha taka enkawl turin Mizoram sorkar kan phût a ni," an ti bawk.

Mizorama thil pawi tak mai chu sorkar pawisaa hnathawh chhe lutuk ṭhin hi a ni. A satu lamin hlep duh tam luatah an sa ṭha lo a nih pawhin a viltu engineer lam talin lo endik uluk deuh se ṭha tur a ni a, hmasawnna tur ruhrel chhe tak taka sak hmuh tur a tam hle a ni.

Tun hnaiah Lengpui Airport saklai chu sak chhiat vangin a chim tawp tawh a, a contractor hrem a ni lo a, a enkawltu engineer pawh hrem a ni hek lo. Airport sak mekah hian hna ṭhenkhat chu tui pek mumal lohin an sa a, an vil uluk lo hle niin a hmuna hnathawktu dangte'n an sawi a, kan ram rohlu tur kan enkawl duh dan hi a vanduaithlak takzet a ni.

Medical college hi kan neih belh lawk dawnin a lang lo a, kan neih chhun pawh kan duat lo hle tih a lang. Tuna building sak thara tui a far mai hi a zahthlak a, a satu contractor leh a viltu engineer-te hian an hna an uluk lo niin a ngaih theih a, a pawi hle a ni.

Kan ram rohlu, mipuiin nitina kan hmuh phak leh kan ban phaka awm mah hetianga kan sa duh a nih chuan, hmun biru zawka hna ṭhenkhat phei chu a ngaihtuahawm hle ang tih a rin theih a, Mizorama contract hna duhdah taka thawh a tam chhan hi kan hnathawh dan kalphung fuh loh vangah a puh theih a, a pawi ngawt mai.