Lunglei Municipal Council inthlan

Lunglei Municipal Council (LMC) inthlanpui hmasa ber chu March 29, 2023-ah neih a ni dâwn a, March 27 tlai dár 4:00 khan campaign hun hi a tawp tawh a ni.

Lunglei khawpui enkawltu tur thlan a ni dâwn ta a, hei hi Lunglei tana hun pawimawh tak a ni. Inthlanna dik leh felfai tak awm se, Lunglei mipuite hian an tana ṭha tur leh anmahni enkawltu tur hi an hre berin a rinawm a; chuvangin political party ṭan luat avanga dan pela chet loh a him ang.

Tun hmain inthlan hrang hrangah 'last minute' an tih mai dan anga campaign hun pelh tawh hnua thil thleng a awm ṭhin a, hei hi Lungleiah hian thleng ve lo se a ṭha hle. Hemi kawngah hian political party lamin dan an zawm lo palh a nih pawhin Lunglei mipuiin zahawm takin lo hnar ngam se, mipuiin ngaihtuahna fîm tak hmangin duhthlanna siam se a ṭha ber ang.

Lungleiah hian inthlanna dik leh fel tak awm se, hmun danga inthlanna lo awm leh tur tán pawha entawntlak khawpin mipuiin dikna nen he inthlan hi hmachhawn se. Rilru fîm tak hmangin an duh ber thlang chhuak rawh se.