Health care bill vbc 70 chuang tâng versus SEDP vbc 300 sem tum
Mizoram Health Care Scheme (MHCS) hnuaia inziak lut damlo bill thehluh tawh chu November, 2021 thleng pawisa pek chhuah tawh a ni a, hetihlai hian damlo bill ba hi cheng vaibelchhe 70 chuang a la ni.
Hetihlai hian Mizoram sorkar chuan Socio Economic Development Programme (SEDP) thawh hnihna (phase II)-ah mi 60,000 hnena sum sem tur cheng nuai 30,000 (vbc 300) a dah a, August 30, 2023 ral hmain sem zawh tura tih a ni.
Tuna Mizoram Health Care Scheme hi March 31, 2023 thleng kalpui tur a ni a; inziak lut turte hian an chhungkaw dinhmun azirin pawisa an pek a ngai a, a hniam berin Rs 200 an pek a ngai a, a sang berin Rs 2,000 an pek a ngai thung.
MHCS hnuaia inziak lutte hian an tih tur ang an ti zo tawh a, pawisa pek ṭul ang angte pawh an inziah luh tirhin an pe tla nghal vek a; nimahsela a sorkar lam hian damlote bill hi a pe ve thei tlat lo a, a pawi hle a ni.
Tuna kan kalphung en hi chuan kum a liam pawhin damlo mi mangangte hian an inziah luhna MHCS aṭangin pawisa an hmu thei lo a, sorkarin health care kalpui dan tur ruahmanna thar a neih te sawi mah se a kalpui mekah pawh leiba cheng vaibelchhe 70 a la nei reng a ni.
Sorkarin damlote inenkawlna senso pe tura a intiam a pe thei lo a, chutihlaiin chu sorkar vek chuan cheng veibelchhe 3000 SEDP hminga sem a tum lawi si a, damlote hian ngaihsak an hlawh lo a ang hle a ni.