Mitthi vui leh inthlan

Chief minister hoa sorkar mi pawimawh, kohhran leh tlawmngai pawl hruaitute, doctor aiawh leh mithiamte chuan Covid-19 hri a darh zel lohna turin mitthi ina inkaihhruaina tur tun hnai khan an rel a. Mitthi chu a remchan dana hall-a vui ṭhin tura tih a nih bakah mi 50 aia tam pun khawm loh tur a ni a, mitthi vuinaa kalte hming pawh chhinchhiah vek turin an rel. 

Covid-19 avang­in sorkar mi pawimawhte an in­hmukhawm reng a, ro an rel ṭhat zel a ngai a, ruahmanna awm sate a ṭhat tawk loh chuan kan boruak milin thil ṭha zawk tur rel zel a ngai. Tun hnaiah chief minister hoin chhiatnia inkaihhruaina tur an duang a, hei hi zawm theih hram ni se a duhawm. 

Khauh taka mi 50 china kan rek bung ngam dâwn a nih chuan chhung khat hnaiah pawh kal thei lo tur an awm dâwn a, YMA hruaitu bikte tán lo chuan pawn lam mi tán mitthi vuinaa kal hi a remchang tawh dâwn lo niin a lang. A hranpa ngata chief minister hoa an rel a nih avangin he thu hi kaltlangpui turah ngai ta ila, kan mitthi vui dan kalphung chu nasa takin a danglam dâwn a; nimahsela Covid-19 laka kan himna tur a nih avangin zawm ngei pawh a ṭha ang. 

Hetihlai hian loh theih loha mipui punkhawmna tur, Mizoram puma mipui nuai chuang an phût mur murna tur Village Council leh Local Council inthlan chu kan buatsaih dâwn mauh mai a, ngaihtuah a tithui hle. Thihna thilah pawh inkaihhruaina a awm reng chungin mi 50 kan pelh thui deuh avangin ruahmanna thar siam a ngai hial a ni a, hun rei lo deuh kan la nghah leh theih inthlan chu kan nawr ta rum rum mai si a, 'A tlak tlak vanduai' tiin kan thuneitu lam hian min nawr chêp chu a ni em lo ang chu maw? 

Engpawhnise mitthi vuina lama punkhawm kan hlauh viau lai hian inthlan kaihhnawihah hian punkhawm hi kan hläu lo palh ang tih a hlauhawm a; kan hlauh leh kan inven chhan ber hi hripui a ni tih i hre thar zel ang u.