Union Home Minister lo zin tur hi chah chhuah nge ama programme?

April 1, 2023-a Aizawla lo zin tur Union Home Minister chuan Mizoram hmun hrang hranga project panga, cheng vbc 315.05 sênga thawh a hawng dawn a, heng zingah hian Zokhawsanga Assam Rifles battalion headquarters a tel. Hei bakah hian cheng vbc. 2,098.97 sênga thawh tur project paruk dang lungphùm a phúm bawk dawn a ni.

BJP, Mizoram Pradesh President chuan Home Minister-in project 11 hawn leh lungphùm phûm turte chu central BJP sorkar hmalakna vek a nih thu a sawi a, "Union Home Minister lo zin tur hi tute emaw chuan anmahni chah chhuah angin an sawi. Home Minister hian Central BJP hmalakna hrang hrang hawnga lungphùm phúm turin Mizoram chauh ni lo, state dangah pawh a kal zel dawn a ni," a ti.

Mizoram Chief Minister chuan March 21 khan Union Home Minister hi Delhi-a a pisaah a hmu a, hetah hian Home Minister hian April ni 1, 2023 ah Mizorama zin a tum thu leh Assam Rifles Battalion Headquarters Complex, Zokhawsang chu rawn hawn ngei a tum thu Chief Minister hi a hrilh niin sorkar thuchhuahin a tarlang.

Home Minister lo zin tur hi Mizoramin an sàwm vanga zin tur ni loin, ama programme ve reng leh state dangah pawh a kal zel tur thu Mizoram BJP President chuan a sawi a, 'Tute emaw chah chhuah a ni lo' tiin a project hawn tur pawh sorkar laipui hmalakna vek a nih thu press conference-ah a sawi bawk a ni.

Home Minister lo zin hi politics-a hlawkpui tum political party pakhat mai ni lo an awm ngei niin a lang a, kan state-ina kan thawh leh tih pawh ni lem lo, sorkar laipui lam thiltihah thangṭhat lak tumahte kan inpuh tawn ta mek a ni.

Engpawhnise, Mizo mipuite duh ber chu AR awmna hmun sak zawh diam tawh hawn ringawt ni loin, a taka Lammual hmun aṭanga sawn chhuah ngei a ni a, kum 2019-a insawn chhuahna tur order ziaka a awm hnuah pawh an la chhuah loh fo avang hian a takin chhuak tawh ngei se a ṭha khawp mai.Union Home Minister lo zin tur hi chah chhuah nge ama programme?