Dan loa sumdawng hnam dangte

Mizo Zirlai Pawl, Muslim Welfare Society Mizoram leh Central Mizoram Gorkha Youth Association (CMGYA) hruaitute chu tun hnai khan an inkawm a, Mizorama hnam dang dan loa sumdawnna kalpuite dap chhuak turin thawhho an rél.

Mizoramah hian hnam dang dan loa sumdâwng an pung chak hle tih hai rual a ni lo a, tun ang zela an puna thuneitu lamin an endik loh chuan Mizoramah hian hnam dangin sumdawnna an rawn din belh zel ang tih a hlauhawm hle a ni.

Hetihlai hian thuneitute tana harsatna siamtu lian tak chu Mizo zinga hnam dang thurualpuitu an awm zel hi a ni. A endiktu leh a veitu lamin an man dawna Mizo dawr anga lantir a, a taka a neitu hnam dang ni daih si sumdawnna tam takah hian a awm niin a lang. Mahni hlawkna uma sumdawnnaa hnam dang thawhpuitute hian kal zelnaah Mizo hnam tán pawi lian tak an khawih a ni tih an hriat a ṭha khawp mai.

Dan loa sum­dawng dap chhuak tura pawl pathum an inthurual hian sorkar thuneitute he mi kawngah hian an mualpho a ni ber a, sorkar tih tur zawk midangin an thawh a ṭul ta zel a ang hle.

Engpawhnise dan loa sumdawnna dap chhuak tura pawl pathum an intel khawm ta hi a lawmawm a, mipui pawhin ṭha takin i thlawp ang u.