Thil man khuahkhirh

Legal Metrology department chuan thuchhuah siamin, Covid-19 léng vanga bungraw lak luh a harsat denchhena an thil zawrhte tito lo turin sumdawngte an hriattir a; MRP (maximum retail price) aia sang leh bûk dik loa bungrua zuar leh hralhte chu pawisa chawitir leh lung-ina tàntir thlenga hrem theih an nih thu an chhuah bakah, mipuiin lungawi lohna an thlenna tur phone number an tarlang. 

Tunlaia thil pawi tak mai chu mipui mamawh lai taka bungraw man an tito ṭhin hi a ni a, mirethei zawkin an tuar na ber zel a ni. Lockdown vanglai khan thil man kha uchuak takin a to a, state pawn aṭanga kan lakluh pawh ni lo kan state-a kan thar chhuah liau liau man a pung hluaite kha a zialo ngawt mai.

Mizoramah hian thil man khuahkhirhtu hi an awm lo emaw tih mai tur a ni a, a bengvar apiangin thil man hi an bithliah emaw tih maite pawh a awl ṭhin. Village Council leh Local Council remhre deuh chuan an huam chhunga thlai leh sa mante an bithliah fo a, hei mai hi ni loin nitina inhlawhfate hlawh zat thlengin fel takin an rel ṭhin. Hetihlai hian hmun tam zawkah chuan sa man hi a zuartu apiangin a duh zat an chhiar mai a, thlaite phei chuan man mumal tak a nei meuh lo a, kan thil man hi a che deuh reng a ni. 

Dawr ṭhenkhatah chuan MRP pawhin awmzia a nei lo a, bungraw vang deuh chu mipuiin an mamawh tih hriaa a man tito chiam ṭhinte an awm a, chumite chu mipuiin loh theih lohna avangin kan dawr a, hrem lohin an chhuak mai ni loin mi harsatna denchenin an hlawk phah fo ṭhin. Tun hnaiah pawh thil pangngai reng hi a vân deuh avangte leh mipui mamawhna a san avanga a man an tihsan chang a awm fo a, sorkarin a ralthlir mai mai a ni ber. 

Legal Metrology lamin mipuite hma ngaia Covid-19 léng vanga bungraw lak luh a harsat denchhena thil zawrhte tito lo tura sumdawngte an hriattir hi a lawmawm a, mipui lam pawhin thil man tito an awm a nih chuan phun lungawi mai loin phone number an tar chhuahah emaw, Legal Metrology office lamah emaw ziakin lungawi lohna thlen ṭhin ila a ṭha hle ang.