Mizo mipui sum luan ralna Iron rod buk tling lo hi

Legal Metrology department chuan tun hnai khan iron rod leh steel zuarte zawm tur thupek an tichhuak a, a buk tling ngei chauh zuar turin an ti a, dan bawhchhiate chu BIS Act, 2016 leh CrPC Act, 1973 hnuaiah hrem theih an nih thu an tarlang.

Legal Metrology department chuan tun hnaiah tualchhungah iron rod leh steel a nihna tur ang bituk tling pha lo, bùk zâng leh tê a tam tih hmuhchhuah a nih thu tarlangin, "Customer-te hian iron bar a len zawnga tling lo an lei fo a, hei hian concrete structure chakna a tichhe thei. Iron rod-te hi a bùk tling ṭha anga chhálin a malin zawrh a ni fo tih hriat a ni," an ti.

In sa thar turte tana phurrit lian tak chu iron rod man pung chak lutuk hi a ni a, thla tinin a man hi a pung a ni ta deuh ber. Hetiang a nih tawh hnu hian iron rod buk tling lo sawi tur hi a awm reng a, chu bakah chuan a size tling lo leh dik tawk lo a awm ṭhin bawk a, hei hi a pawi takzet a ni.

Iron rod man tozia leh a buk tling lo avanga Mizo mipui sum luanral hnem tawh turzia hi chhut thiam harsa khawp a ni a, tun hnaia buk tling lo thut ni loin hun rei tak chhung chu iron rod buk tling lo hi sawi a awm tawh.

Legal Metrology department lam hian thil dik tawk lo a awm a ni tih an hre tawh a, tun aia taima zawk leh ṭhahnemngai zawkin bukna dik lo leh teh tling lo hi zawng chhuak se. Thawktu indaih lohna an neihte pawh sorkarin ruahmanna siamin a ṭanpuitu tur pawh siam nghal thei se, iron rod buk tling lo leh a size dik lo hi Mizoramah hian tihtawp a nih ngei theihna turin ṭan lak a hun a ni.