Zokhawsanga AR hmun hawn a ni ta

Union Home Minister Amit Shah chuan Zokhaw­sanga Assam Rifles battalion headquarters sak zawh tawh chu tun hnai khan a hawng a, Aizawl khawpui laili aṭanga AR insawn chhuah tur thu a sawi.

Zokhawsanga AR insawn chhuah tur hi thil thar a ni lo a, 1988 khan Aizawl Bawrhsap chuan Zokhawsanga AR insawn chhuahna turin land lease a lo hlan tawh. He ram hi a zau tawk lo an tih avangin kum 2006 khan AR ho dil belh angin Zokhawsang Land lease (No DLL 62 of 2006 ) chu Director General AR, Shillong hnenah hlan a ni leh tawh a, kum 2008 khan Aizawl khawpui laili aṭanga AR-te insawn chhuahna tur hi sak ṭan a ni.

AR insawn chhuah tur hi chu thil chiang sa reng ni mah se an awmna tur sak a muan avang te, anni lamin insawn chhuah an hmanhmawh loh avangin an chenna tur building sak zawh a nih hnuah pawh an la chhuak fel lo.

Ministry of Home Affairs chuan February 19, 2019 khan AR-te hi insawn chhuak tura tihna order a chhuah ta a, May, 2019 ral hmaa insawn chhuak tura tih an ni a, an la insawn chhuak chuang lo. Tun hnaiah Union Home Minister chu Aizawlah lo kalin amah ngeiin an insawn chhuahna tur chu a hawng tawh a, AR-te hi an insawn chhuah a hun tawh takzet a ni.

Mizoram sorkar­in na taka a nawr chung pawha AR-in Lammual hmuna an awmna an chhuah­san duh lo tlat mai hi Mizoram sorkar leh Mizote tan pawh a tlawmthlak a, an chenna tur ram pek belh an ni chung pawha chhuah an tum lo hi a zialo hle a ni.

Tunah chuan Union Home Minister meuhin an chhuahna tur hmun a hawng tawh a, AR te hi insawn chhuak ngei tawh rawh se.