Hnam dang laka sum khawn

Tun hnaiah YMA branch pakhat chuan construction hnathawktute lakah Rs 1,00,000 pe turin an phût a, he pawisa hi an pek loh chuan YMA-in na taka hmalak an tum thuin an vaukhan. Hei hi hriain Central YMA hruaitute chuan an kal chilh a, an thil tum hi sût turin an ngen a ni.

He thil hi ngun taka ngaihtuah ngai a ni a, Mizo tana mualphothlak tak a nih laiin he thil hi a ruka kal reng a ni lawi si. Zep thu a cheng lo a, Mizorama hnathawktu hnam dang contractor leh supplier hrang hrangte hnena pawisa khawn ching pawl an awm a, anni lam hi chuan inthiam tak chungin hetiang thil hi kalpuiin a hmingah 'donation' an ti mai a, phal tak leh lawm taka pek angin an lantir ṭhin a ni.

Hetianga pawisa pe ṭhinte hi chu an pekte lakah hian an ngampa hle ang tih a rin theih mai a, chutih rualin an pawisa pek hi anmahni chanpual aṭanga a thlawna pe ni loin an hnathawh leh thil supply tur aṭangin an siam rem leh ngeiin a rinawm a, a tawpa tuartu chu Mizoram tho a nih hmel.

Mahni thawh chhuaha kal tura kan inzirtir laiin kan pawl ṭhenkhatte chuan hnam dangte lakah tihluihnaa pawisa khawn an hnial hauh lo a, heti zela kal hi thil pangngaiah an ngai nghet tlat tawh a, he thil kalpui dan (practice) hi ngaihtuah ngun deuh chu a ngai ta khawp mai.