Mi 777 an positive ta

Mizoramah August 15 thleng khan Covid-19 positive 777 hmuh chhuah an ni tawh a, tun thlengin Covid-19 avanga nunna chân Mizoramah an awm lo. 

Khawvel buaipui hripuiin Mizoram a luh ve hma aṭangin sorkar leh mipui ṭang rualin theihtawp kan chhuah tlang a, hun rei tak chhung chu Covid-19 vei awm mang lohna state kan ni. State pawna awmte an lo haw a ṭul a, loh theih lohna avangin sipaite pawh an lo luh a ṭul a, kan nitin mamawhte phurh luh a ṭul bawk a, state dangte ang bawkin zawi zawiin Covid-19 hri hi kan state-ah a lo lut ve ta.

Covid-19 hi lockdown hmanga do hi sawt bawk mah se inkharkhip reng thei tur khawpin kan khawsak dinhmunin a zir lo ve thei a, Mizorama inkharkhip avangin chhungkaw tam tak eizawnnain a tuar a ni. Hetihlai hian 'a hlauhawm lohlaia inkharkhip a, a hlauhawm huna inkharkhip duh leh si lo,' tia phun pawl an awm bawk a, an ṭanna hi a dik ve tho ang. 

Tunah hi chuan sorkarin lockdown neih chhunzawm a tum lo mai ni loin August 27 hian Village Council leh Local Council inthlan kalpui a tum a, mipui nuai chuang an chet velna tur a huaihawt dawn a ni. Kan dinhmun en hi chuan mahni ngaihdan lam sawi uar a, a hlauhawmna leh kan dinhmun chhiat thut theih dan hi sawi vak theih a ni a, chutihlaiin tun thlenga thihpui kan la awm miau loh avangin Covid-19 hi hri hlauhawm vak loa sawi pawlte pawh an awm ta. 

Engpawhnise kan state dinhmun kan hria a, Covid-19 positive 777 zet kan neih ve tak avang hian he hripui hi a la ṭai darh zel palh thei a. Hri vei an pun zel lohna tura rorel thiam hi a pawimawh a, thihpui kan awm hnua hlauh thar chiam ai chuan, thihpui kan awm hmaa ṭan mar pât hi a pawimawh hle a ni.