Larsap leh kawngpui

Mizoram Governor chuan tun hnai khan Raj Bhawan-ah Mizoram PWD hotute koin, PWD hnathawh leh hmalaknate a sawipui. Larsap chuan PWD hotute a koh chhan chu, hna hrang hrang an kalpui mek dinhmun hriat a duh vang a nih thu sawiin, "Hna a hun taka zawh loh a nih chhante leh harsatna in neihte hriat ka duh a, hengte hi ministry lamah kei pawhin thlen ka duh vang a ni," a ti.

Larsap hi kan state-a kawngpui din­hmun hre u a ni a, pawisa lo lut zatte leh a hman dante pawh hretu a ni ngei ang a, hetianga PWD hotute a ko hian chhan lian zawk a nei thei ang. Mizorama kawngpui siamna tur sum luh dan leh a hman chhuah dan te, hnathawh a muan chhan hrang hrangte hi chhui tham a ni reng a ni.

A huna hna thawh zawh loh avanga sorkar lamin a chawi belh zat te, mipuiin an tawrh dan te, chutihlaia contractor tana thil hlawk zawk a nih theih si dante pawh hi zir tham a awm. Kan ram hi tlang ram a nih vanga kawngpui siama harsa bika in chhuah reng pawh a dik famkim lo deuh a, keini ang bawka tlang ram ve thote nena in khaikhin ve ṭhin pawh a ṭha ang.

Larsap mi thiam tak, kan state din­hmun min veipui phak kan nei a, ani hi sorkar laipuiah pawh âw nei tham tur a ni. Kan kawngpui dinhmun, kan sum hmuh zat leh a hman chhuah dan, sum pek chhuah muang leh hnathawh muang lutukin a nghawngte thlengin a hrethiam ngei ang. Larsap hian Mizoram kawngpui hi vei chhunzawm zel se a ṭha ang.