SEDP kalpui dan tur

Mizoram State Planning Board Vice Chairman hoin tun hnai khan SEDP Family Oriented thawhhnihna (Phase II) kalpui dan tur an sawiho a; sorkar flagship programme SEDP thawhhnihna atan hian chhungkua 60,000 hnenah ṭanpuina pek a ni dawn a, chak taka hmalak mek a ni. SEDP Family Oriented Programme thawh­hnihna hi Mizoram State E-Governance Society (MSeGS) te nena ṭangrualin online a kalpui tum a ni.

SEDP kalpui dan­ah hian inhnialna a awm chho reng dâwn a, a ṭha ti leh a ṭha ti lo hi an awm reng ang. Hetihlai hian SEDP kalpui dan turah pawh sorkar thuneitu lam thu leh hla a inrual hleithei lo.

Kan ram hruaitu zingah political party campaign-na chi khat anga sorkar sum lo sawi duh tawk an awm a, kum 2023 kum tawpa MLA inthlan awm tur leh SEDP sawi zawm an awm. Chuti a nih chuan sorkar flagship programme hi political party tana ṭha tura her remin inthlan dawnah sem an tum a ang lek lek thei.

Tuna kan sorkar hian kum 2018 kum tawp khan thuneihna a chang ṭan a, hun rei tak chhung chu mipui thleng phakin SEDP hi kalpui a ni lo. Kum 2023 kum tawpah inthlan a awm dâwn a, chumi boruak awm tawh hnuah sorkar sum SEDP chu sem ṭan niin sorkar hotu lu lamah inthlan leh SEDP sawi zawm duh tawk an lo awm. Hetiang a nih ngai chuan Mizoram sorkar sum SEDP hi chhungkaw eizawnna bul ṭanna lam hawi aiin political party inthlan campaign-na rawng a kai ta a ni mai lo maw?