Zirlaite leh Politics

ICFAI University, Mizorama Political Science department chuan tun hnai khan ICFAI Political Talk 2023 - Political Dissection of Political Parties in Mizoram tih chu an buatsaih a, Mizorama political party hrang hrang aiawhten an party kalphung leh hmachhawpte an sawi.

Mizorama political party hrang hranga hruaitu zingah hian zirlai hruaitu ni ṭhin ṭhahnem tak an awm a, kan ram hruaitu langsar zingah pawh zirlai hruaitu an awm nual a ni. Tun hma aṭang tawhin zirlaiten politics hi an ngaihven ṭhin a, politics avanga tan ina khungte pawh an lo awm hial tawh a, Mizoramah zirlaite tan politics hi thil thar a ni lo.

Hetih lai hian zirlai nawlpuiin tunlai anga politics an ngaihven hi a la tam lo mai thei a, zirlai zingah Mizoram politics dinhmun ngaihtuah ran mai, a ṭhente chu politics-a âwn lam neisate pawh an awm ta hial. Kan ram dinhmun an thlir a, an kal zel dan tur leh an eizawnna tur an ngaihtuah a, hengte leh ram politics hi a inzawm tih man thiamin tun aṭangin politics an ngaihven niin a ngaih theih ang.

Zirlai hruaitu zingah ram leh hnam hmangaihna tak tak nena zirlai hruai hna kalpui an awm a, ṭhenkhat erawh political career ngaihtuah ràna zirlai pawla inhmang pawh an awm thei ang. Chutih laiin a zirlai pawla inhmang ve kher lo, zirlai la ni chunga politics lam ngaihvena chumi hmanga ram siam ṭhat tuipuitu an pung zel a, hei hi thil lawmawm tak a ni.

Engpawhnise, zirlaite hian political party âtchilhna tel lo, zirlai hruaitu zinga mahni political career chiah ngaihtuah ang chi ni lo, ram politics ngaihvenna hi lo zual deuh deuh se, hei hi kan ramin a mamawh chu a ni.