Ruihhlo lut tur uluk zawka ven a ngai

Excise & Narcotics Minister chuan tun hnai khan thuchah sawiin ruihhlo dona kawngah Zoram mipuite kan ṭanrual a ngaih takzet thu a sawi a, social media lama darh vak ruihhlo hlauhawm Fentanyl erawh Mizo­ramah a la luh loh thu a sawi.

Excise Minister sawi danin ruihhlo dona atana commi­ttee lo awm tawh sa chu Chief Minister hmalaknain thar thawh leh niin hemi atan hian cheng vaibelchhe 3 hman a phalsak a; he committee hian supply reduction, demand reduction leh harm reduction chak zawka kalpui tumin Mizoram pumah hma a la mek a, district leh village level-ah ruihhlo dona kawngah hma chak taka lak an tum thu a sawi tel bawk.

Hetihlai hian Mizoramah dan rual lohin ruihhlo hlauhawm Heroine no. 4 chu a lo lut zel a, tun hma zawng aiin a tam ta zawk a ni. Myanmar aṭanga Mizorama ruihhlo lo lut tur hi vengtu awm lo ang maiin zalen takin a lo lut thei a. Tun hnaiah ramriah vengtu an awm mumal loh avangin ruihhlo a pung hluai pawh hi a mak hran lo. Mizorama lo lut tawh, an phurh darh tur leh ruihhlo ngaite hnena an zawrh chhawn leh tawh man hi awm reng mah se a man loh a hlawm lian tak hi a awm ngeiin a rinhlelhawm a, tuna kan ruihhlo do dan hi chu a lut tur lam veng uluk si loa a lut tawh sa theih ang anga man tum kan ang hle a ni.

Ruihhlo bakah hian ruihna atana hman theih dam­dawi hi a hluar hle reng bawk a, heng damdawi hman sualte hi dan ang thlapa chah luh ni chunga dan loa zawrh leh hralhte a awm thei a, dan phal loha lakluh pawh a awm thei. Miin an ruih tura an lei tawh ven lam aiin a lut tur leh a zawrh chhuah tur ven hna hi tun aia chak zawka thawh a ṭul hle.

Kan ramin a buaipui lian ber nia chhal ngam heroine no. 4 lo lut tur kan ven danah hi chuan sorkar a inennawn a ngai a, excise leh Police lam an indaih lo deuh a nih pawhin an a hmun pawimawh bikah indaiha an awm theihna turin sorkar hian ruahmanan thar nei rawh se.