Doctor neih belh hi thil lawmawm a ni

Zoram Medical College (ZMC) a MBBS zirlai batch hmasa ber, kum 2018-a zir ṭante chuan an zirlai zoin result a chhuak ta a, zirlai exam 95 zinga mi 68 an pass a, 71.57% an pass a ni.

Mizoramah doctor indaih lohna a lian hle tih a taka hretu kan ni ṭheuh a, sorkar pawhin a mamawh zat rawih tur a hmu zo lo a ni ber mai. Sorkar-in doctor lak belh theihna project a neih ṭhenkhatah chuan a duh ang mi lak tur a hmu lo a, hei hian doctor mamawhna a sanzia a tichiang mai awm e.

Mizoramin medical college a din theihna tura a sulsutu leh theihtawp chhuahtute an fakawm a, state tana ro tling dintute chungah mipui pawh an lawm hle ang tih a rin theih. He medical college hian chanchin a ngah hle a, a bul ṭan dan, harsatna a tawh chhoh dante ngaihtuah chian chuan tuna MBBS zirlai an chhuak ta maite hi thil lawmawm tak a ni.

ZMC hian hmasawn chho zelin ṭhang duang zel se, tunah hian mamawh tam tak a la nei a, a ruh langa sawi chuan India rama medical college zinga hmasawn mamawh ber zinga mi pawh a la ni hial awm e. Hei vang hian Mizoram sorkar pawhin tun aia changtlung zawka a thuam a, a ṭul anga funding awm theite dap khawma a thuam chak ala ṭul viau mai a, hei hi state sorkarin chonaah ngai se a ṭha ang.

Medical college neih mai hi a tawk lo a, MBBS chher chhuah mai pawh hlawhtlinna a la ni lo. He hmun aṭang hian doctor thiam tak leh mamawhna hmuna kal hreh lo chher chhuak zel se, Mizoram tan he medical college hlutna hi a zual zel dawn a ni.