Lengpui Airport chei hna

Hmar chhak enkawltu bik DoNER Minister chu tun hnai khan Mizoramah a lo zin a, Lengpui Airport chei ṭhat hna thawh mek chu enin kumin October-a zawh hman hram a duh thu a sawi a, PWD lamin kumin December-ah zawh theih an inbeisei thu an sawi thung.

Lengpui Air­port chei ṭhat hna hi Mizoram sorkar hian a ngai pawimawh viau mai a, Covid-19 hripui lenlaia kan chhuah ngam mang loh lai pawhin Chief Minister-in he hna hi a hmunah a enpui a, vawi khat mai ni loin a lo en tawh ṭhin a ni.

Vanduaithlak takin Lengpui Airport cheina hna, PWD changtu Chief Minister ni bawkin a enpui tawh ṭhina chu kum 2022 March-ah khan a chim hlauh mai a; thil mak tak chu a endiktu engineer zingah hrem tawk an awm lo a, contractor-in hrem leh hrêk a hlawh hek lo a, sorkarin a thlir liam a ni ta ber mai e.

Sorkar sum in­daih loh lai pawha department 20 chuang budget aia sang sen tawhna airport chei ṭhat hna hi a kal chak lo hle a. Vanduaithlak takin trolley tih mai maiah buaina a lo awm ve bawk nen, a chhe zawngin a thang nasa hle a ni.

Engpawhnise he airport chei ṭhat hna sum heh leh sawi hlawh tak mai hi chak taka thawh ni se, mipui sum hmanna a nih ang ngeiin mipui hman theiha peih vat ni rawh se.