YMA leh eiruk do

YMA Central Coordination Committee (CCC) tun hnaia ṭhukhawm chuan, Mizorama eirûkna leh hlemhlêtna a reh theih nan YMA sub-headquarters, group leh branch chhungah chak zawka hmalak an rèl a. Kut tling loa sum la lut leh thawh chhuah phú loa khawsate en dawng thiam an duh thu an puang bawk.

Mizoramah eiruk a hluar ta hle tih a lanna chiang tak chu kan pawl lian berin eiruk a do ta hi a ni a, eiruk leh hlemhlêtna do kawngah chak zawka hmalak an rèl ta hial a ni. Hei mai hi ni loin mahni thawh chhuah phú loa hausate endawng hial an duh bawk.

YMA lamin eiruk an duh loh thu huaisen taka an puang hi a lawmawm a, chutih rualin eirute an eiru a ni tih finfiah leh YMA anga bawhzui vak erawh thil awl a ni hauh lo ang. YMA hian eiru man chhuah leh hrem hi duh viau mah se anni tán hma lak vak a awlsam dâwn lo. Eiruk do tura an thawh thiam dan leh an thawh theih dan tur an duan chhuah a ngai ang.

Tun hnaiah RTI Act hmangin eiruk do hi thui tak kalpui theih a ni tawh a, YMA hian a member-te hi RTI Act hmang uar thiam tura fuihin a hman dan zirtirna te pawh kalpui thei se a ṭangkai hle ang. Hei bakah hian ṭhalaite leh naupang deuh zawkte hnenah pawh eiruk ṭhat lohzia leh a nghawng chhiatzia tun aia nasa zawkin zirtir bawk se, hemi kawnga ke a pen chuan Zoram tan rah ṭha a chhuah ngeiin a rinawm.

Eiruk do tura rilru siam a, eiruk do duh khawpa huaisen ṭhahnem tak an awm hi a lawmawm a, eiruk do tur chuan mahni lam hi eirukna leh hlemhletna laka fihlim a ngai tel bawk a, he inzirtirna hi uar zawka kalpui a pawimawh hle a ni.

Kan ram dinhmun en hian mi ṭhenkhat chuan anmahni hlawkna tur thilah chuan hlauh leh midang mitmei ven pawh nei loin hlemhlêtna hi an kalpui ngam a ang hle a, YMA meuh pawhin ngawih chuh thei loin eiruk do tura ke pen a tum ta hi a lawmawm takzet a ni.