Aizawl khawpui leh inthlan
Mizoram sorkar chuan tun hnaia Covid-19 hri darh zel dan thlir chung leh, he hripui laka kan him tlan theihna turin Aizawl Municipal Corporation huam chhungah August 16 zan aṭangin August 21 thleng total lockdown a puang. Hetihlai hian State Election Commission ruahman dan chuan August 27 hian AMC huam chhungah hian Local Council member thlan a ni ang.
Democracy-a thil pawimawh ber nia chhal theih chu mipuiin an aiawh roreltu tur an thlan hi a ni. Mizorama inrelbawl dan khaidiata a hmasa ber anga ngaih theih, mahni khúa leh veng enkawltu tur Village Council leh Local Council member inthlanna neih turin State Election Commission chuan a rel a; inthlan ni tura a ruat August 27 a hnai tawlh tawlh a Mizoramah hri kai an pung ve tual tual bawk.
SEC hian hri lêng hi a hre lo a ni bik hauh lo ang a, kan hmalam hun a sawi theih loh avangin hun harsa zawk pawh kan tawk thut palh thei tih hre chungin he inthlanna kalpui mai hi a duh a ni ngei ang. SEC tarmit aṭanga thlir chuan thil dik leh tih âwm tak a ni thei a, nimahsela kan state mipuite sahimna ngaihtuah erawh chuan inthlan hun lo lai tak a ni ve thei bawk.
Ram puma inthlang tura ruahmanna awm tawh hi sŭt leh ni dâwn ta se, sum leh tha tam tak a lo thlawnin a ral dâwn a nih hmel a, thuneitute tán inthlan hun sawn hi a harsa tawh hle ang. Chutihlaiin tuna VC leh LC term an pawh sei chhan ber hripui hi a la reh lo a, a pung tual tual bawk si a, term an pawhsei tawh hi an duh phawt chuan a aia rei deuh pawh seiin hun ral muang hret zawk pawh an nghak thei ang.
A ram puma inthlan hun sawn hlat hi a harsa tawh a nih pawhin, AMC huam china Local Council inthlan emaw tal hi chu sawn hlat a ṭha mai thei a; August 21 thlenga 'total lockdown' ni chunga August 27-a vote nei zawng zawng koh chhuah tum hi thil fin thlak ber a nih hmel tawh lo.