Social media indona an puang em ni?

MNF President leh Chief Minister ni bawk chuan, a kaihhruai sorkar chu a chhe thei ang bera social media-a beiah leh sorkara beidawng ngawih ngawih tura mipui leh ṭhalaite fahah eptu party-te a puh a, "Zoram chhe lailet dêr angin an chhuah. Mipui leh ṭhalaite sorkar laka beidawng ngawih ngawih turin an fah a ni. Chuvangin, beihpuiin kan bei ve tawh dawn," a ti.

Chief Minister meuhin Social media lama a party beihna nâ a tih tawh chuan, a dawngtu tán chuan 'social media mai mai' tia sawi nep chi a ni hauh lo tih a lang. Social media a nih tâk avanga ṭawngkam kan thlahdah em em mai te, anchhe lawhna piah lama dawt phuahchawp hmanga inbeihna hial a awm ṭhin hi a ṭha lo takzet a ni.

Social media hi chu thunun hleihtheih loh a ni a, a hmang theitu hi mipui nawlpui kan nih miau avang hian a chhangchhe deuh dâwn tih hi chu a chiang sa reng a ni.

Chutihlaiin dawt phuah­chawp hmanga inbeihna a tam lutuk erawh hi chu a pawi a, mipui rilru hruai kawi thei tura kan che ta mai ṭhin hi a ṭha lo a ni. Politics a nih tâk avanga engpawh leng ang maia kan khawsa pawh hi a fel lo hle.

Hetihlai hian social media-ah hian eng political party mai pawh hi an inbei tawn reng a, mipui nawlpui thlekna lam hian thlawp a hlawhin an duh loh lam hian beih an tawk deuh ni maiin a lang zawk a, tute party emaw an beih rawn bîk niin a lang lo.

Chief Minister meuh pawhin thapuia an beih lêt ve tur thu a puang nghal rup mai hian social media hi kan la hmang thiam dâwn lo a, kan la inbei zui zel dâwn a ang hle a ni.