Vantlang kawng tichhetu mimal sumdawng

Awithangpa Group YMA hruaitute chuan, Kawnpui leh Bualpui inkara lung lakna quarry neitute chu hna an thawhna hmunah kal chilhin, national highway kawngpui aṭanga quarry panna kawng an siamin tui luankawr (side drain) a hnawh avangin rang taka tui luankawr tifai turin an hriattir a; YMA ngenna an zâwm lo a nih chuan a ṭul anga hma an lak zui dâwn thu an hrilh.

Mizoram hmun hrang hrangah hian vantlang kawngpui hi quarry neitu mimal sumdâwngte hian an tichhe nasa hle mai a, hemi kawngah hian a tichhetute an demawm rualin kawngpui siamtu leh viltu sorkar lam pawh hi an vuaicha ṭhin hle a ni.

Mipui pawisa hmangin sorkarin kawngpui a siam a, a siam dan tur quality phak loa siam a awm ṭhin piah lamah quarry neitu lamin dim lo takin an hmang zui a, a chhiat phah nasa hle a ni.

Quarry nei zinga a tam zawk hian a sira tui luanna tur an hnawh phui a kawngpuiah tui a tling a, a luang bawk a, kawngin a tuar nasa a ni. Hei bakah hian quarry awmna hnaiah chuan kawngpui a chhe hma deuh zel bawk a, lirthei lian leh phur rit tak takin a chil reng a, mipui vantlang tán an hnawksak ṭhin hle a ni.

Mi eizawnna a nih avangin tawng­pawng insawisel ngawt hi a ṭha ber lo thei a, nimahsela tun aia an fimkhur sawt a ngai a, sorkar lam hian vil ṭhain thunun ngam se buaina tam tak hi pumpelh theih a ni ang.

Sorkarin a kawng­pui siam a enkawlin a vil zui ṭha tawk si lo a, tunah Awithangpa Group YMA an rawn au chhuak ta a, a lawmawm takzet a ni. Hmun danga YMA-te pawhin hmai zah bîk nei loin mahni huam chhunga kawngpui enkawl leh venhim hna huaisen takin thawk thei se a lawmawm hle ang.