Health care sum rulhna tur loan

Health Minister chuan, Mizoram State Health Care Scheme-a damlote pawisa sorkarin a bat rulhna turin kum 2023-24 budget-a healthcare atana sum dah vbc. 60 zinga eng emaw zat chu thla thar, May 2023-ah pek beisei a nih thu a sawi a, "Health care pawisa cheng vbc. 70 vêl kan bá pawh thla tharah chuan budget-a cheng vbc. 60 kan dah aṭangin eng emaw zat bill kan release ka beisei. ADB project kan tihfel chuan health care bill táng a awm tawh dawn lo a ni," a ti.

Health care scheme kalpui dan a fuh loh vang nge, sorkarin sum a pek duh loh vang zawk nge ni Mizoramah hian damloten an senso phuhrukna tur hi a hunah an dawng thei lo a, a kuma kum nghah a ngai. Damlo rethei mangang tam takin pawisa puk chawpin an bill an rul a, Mizoram State Health Care Scheme aṭanga hmuh lêt an inbeisei hlawm a ni. A huna an hmuh theih tâk loh avangin chhungkaw tam tak an rûm mek a ni.

Sorkar hian sum a nei lo ti dawn ila, thil ṭhenkhatah chuan state pawisa aṭang thoa an hnathawh chhuang taka sawi tur an nei reng a. SEDP lama sum an dah sâ pawh a thiam leh thei deuh chuan an hnuk chhuak thei deuh reng niin a lang. Hetihlaia Mizoram State Health Care Scheme hnuaia sum an pe thei lo leh damlote an tawrh tir reng hi chu a zialo ngawt mai.

Chutihlaiin health care system hrim hrim hi thil kalpui hautak zet mai a ni a, Mizoram sorkar chang ni lo sorkar dangte pawh an lo talbuai tawhna a ni. Hei vang pawh hi a ni mah nâ, tluang taka kalpui an tum dan pawh a pawisaa puk belh zawng bawkin a ni dâwn a, Asian Development Bank aṭanga sum puk hunah health care pawh tluang takin a kal thei dâwn tih Health Minister-in a sawi.

Heng kan loan pukte hi sorkarin a rulh leh tur a ni dâwn a, damlo laka sorkar leiba rulhna tura loan pukte pawh kan ang dâwn dâwn a, chuti loa sawifiah tum chu thil harsa tak a ni ang.