Sorkar sikulah admit sên loh zirlai?

School Education Minister chuan Mizoram sorkar sikulah zirlai admit sen loh an awm tawh thu sawiin mipuiin sorkara rinna an nghat ngam tawh chu lawmawm a ti a; ram chhung leh pawn ngaihtuahin Mizorama zirna hi a hniam bik loh thu tun hnaia National Education Policy (NEP) 202O zirhonaah a sawi.

Mizoram zirna hi a hniam leh hniam loh thu-ah hian a tehna mumal tak neih a harsa a, a fak duh tana fak theih tak tur a nih rual hian a sawisel duh tan chuan sawisel theih pawh a ni ang. Hetihlai hian zirnain hma a sawn zel tih erawh a chiang a, state dangte zirna hmasawn zel danin hma kan sawn phak ve em, tih erawh kan inteh reng a ṭha ang.

Sorkar sikulah zirlai lak sen loh an lo awm ta hial niin Minister-in a sawi a, hei hi thil lawmawm tak a ni. Khawi hmunah nge lak sen loh an awm tih hi hriat chian erawh a ṭha hle mai a, zirlai nei mumal lo sikul tam tak an awmlaia zirlai lak sen loh nei an awm hian zirtirtu sem rual a ṭulzia a tilang zual awm e.

Zêp thu a cheng lo a, khaw­puia zirtirtu ṭhen­khat chuan zirlai tur an zawng khawm hial a nihlaia zirlai lak sen loh an awm thu Minister-in a sawi hian admi­nistration lamah siam rem ngai a awm tih a lantir a. Heng zirlai lak sen loh awmna hmunah te hian zirlai nei mumal lo zirtirtute hi sem rual thei se a ṭha ngawt ang.