Ruihhlo leh zu laka ven ṭhat loh Mizoram

Excise & Narcotics department (END)-in ruihhlo chi hrang hrang an man zinga court-in a chinfel tawh Rs 14,09,13,395 (nuai 1,409.23) man hu chu tun hnai khan END Minister-in a hal ral. Ruih theih thil chi hrang hrang tihral zingah hian zu leh beer Rs 37,63,550 man a tel a, ruihhlo chi hrang pakua a vaia Rs 13,71,49,845 man a tel bawk.

Kan ramah zu kan khap bur a, chuti chung chuan zu a zalen hle tih phat rual a ni lo. Aizawla veng pakhatah chuan zu hralh phal loh ni an siam hial niin media ṭhenkhat chuan an report a, chuti a nih chuan zu khap burna dan hmanna state-ah 'zu hralh phal loh ni' an siam tihna a ni a, hei hi sorkar tan mualphona tawp a tling.

Zu kan khap e, tia thlir liam mai chi a ni lo a, zu khap hnuah zalen takin zu chhe zawk leh hrisel lo zawk an hralh mup mup reng a, chumi tichiangtu turin tun hnaia Court-in a chinfel tawh an tihral zat ringawt pawh cheng nuai 1,409.23 man a tling a ni. Heti zat an man chuan an man loh chu a la tam zawk fe ang tih a rin theih a, kan ramah zu a zalen hle tih hi thil chiang tak a ni.

Hei bakah hian ruihhlo chi hrang hrang hmuh tur leh man tur a awm reng a. Ruihhlo ti ṭhinte pawhin dai kil kar chuh tawh loin kawngpui ualau laiah an zuarin an rui ngam tawh a ni. Hei hian a lantir chu kan rama ruihhlo tamzia a ni a, tun ang reng a nih chuan kan hmabak a êng lo hle a ni.

Tlawmngai pawlin hlawh nei loin chhun zan zawmin zu leh ruihhlo do hna an thawk chung pawhin kan ram dinhmun chu heti hi a ni a, zu leh ruihhlo lo lut tur hi ven loh ang mai a ni a, sorkar hi a ṭan deuh a ngai a ni.